Mbrëmja e sotme rezervoi derbin e Madoninës mes Milanit dhe Interit, në një prej dueleve më të luftuar në futbollin botëror.
Në fillim të sfidës, dy tifozeritë mbahen për shpalosjen e banerave thumbues ndaj njëra-tjetrës duke e bërë dhe më të bukur derbin, por mbrëmjen e sotme tifozët e Milanit kanë bërë diçka krejt tjetër duke fituar respektin e shumë tifozëve në Itali.
“Curva Sud” e vendosur pas portës ka shpalosur një banderolë gjigante dedikuar mjekëve dhe jetëve të humbura nga Covid-i, duke marrë duartrokitjet e gjithë stadiumit. Njëkohësisht janë shpalosur dhe banderola ku shkruhej:
“Atyre që luftuan dhe nuk ia dolën. Atyre që luftuan në vijën e parë për të shpëtuar kombin. Nderojmë të gjithë këta persona, duke i kushtuar koreografinë më të rëndësishme të sezonit”.
Vlen për tu përmendur dhe fakti se mesfushori i zikaltërve Hakan Çalhanoglu është vërshëllyer në momentin që ka dalë në fushë, duke u cilësuar si tradhtar nga tifozët e Milanit.