Çfarë merkato do të jetë te Barcelona pas ardhjes së Xavi Hernandez? “E varfër” – sipas ESPN. Sepse katalanasit do të kenë mundësinë të shpenzojnë jo më shumë se 10 mln euro në dritaren e transferimeve të janarit…
Një dimër më i ftohtë se kurrë dhe me aspak ngrohtësi. Operacionet e të shkuarës duhet të harrohen shpejt, pasi gjendja e arkave blaugrana është katastrofike, aq sa sipas asaj që thuhet madje edhe me një rrogë 1 Euro, Dani Alves, nuk mund të federohet.
La Liga monitoron dhe Barcelona nuk lëviz dot. Borxhet janë deri në fyt dhe bilancet e kuqe po shpërthejnë. Laporta e di, por tani e di edhe Xavi, që është thërritur të vendosë pak rregull dhe të paktën të çmojë organikën që ka në dispozicion.
Janë shumë ata që mund të largohen, por rrogat e tyre janë një problem më vete për blerësit, pasi janë ende të larta, edhe pse disave i është përgjysmur.
Një situatë nga e cila duhet të dalë me durim dhe qetësi Barcelona, që për herë të parë në histori e sheh veten në një moment të tillë.