Fituesi i “Topit të Artë” për këtë vit do të shpallet më 29 nëntor, në një gala që do të mbahet në Paris. Dhe, siç ndodh shpesh çdo vit, sondazhet dhe parashikimet shtohen me afrimin e datës. Benzema, Lewandowski, Jorginho, Messi, Kante… Çdo gazetar apo ish-lojtar ka të preferuarin e tij. Të fundit që folën për këtë çmim prestigjioz ishin Evra dhe Henry.
Duke folur për “Journal du Dimanche”, ish-mbrojtësi i Manchester United zgjodhi lojtarët e Chelsea (Jorginho dhe Kante) si favoritë të tij, ndërsa hodhi poshtë kandidaturën e Messit me vrullin e tij të zakonshëm: “Për mendimin tim, ky ‘Top i Artë’ është për N’Golo Kante ose Jorginho. E meritojnë të dy! Nuk e kuptoj pse njerëzit thonë për Jorginho: Ai është thjesht një mesfushor. Në fakt, ai fitoi gjithçka, mori pjesë shumë në këto triumfe”.
Më tej, ish-mbrojtësi francez shtoi: “Sipas mendimit tim, nëse Jorginho nuk e fiton atë, do të ishte padrejtësi. Jam mërzitur duke ia dhënë çdo vit Messit këtë trofe. Çfarë fitoi ai sezonin e kaluar? Mirë, Kupa e Amerikës, por me Barcelonën, çfarë bëri?”
