Leonardo Bonucci është nominuar për mbrojtësin më të mirë të vitit në “Globe Soccer Awards”, prandaj ndodhet në Dubai për të marrë pjesë në ceremoni. Mbrojtësi qendror i Juventusit dhe i kombëtares italiane foli për objektivat e radhës të skuadrave të Mancinit dhe Allegrit:
“Me fitoren e Kampionatit Evropian jemi bërë legjenda, por tani duhet të kualifikohemi në Kupën e Botës. Me fanellën bardhezi mundemi të hyjmë në tetëshen e parë të Europës”. Duke komentuar suksesin e verës së këtij viti me axurrët, Bonucci shton: “Ishte diçka e paharrueshme fitimi i Kampionatit Evropian, por ne nuk jetojmë me të kaluarën.
Më pret një janar shumë i ngarkuar me Juventusin, pastaj do të luajmë 1/8 finale të Ligës së Kampionëve. Juve meriton të hyjë në tetë skuadrat më të mira në Evropë, kështu që duhet të ecim përpara. Sa i përket Italisë, pas një viti 2021 të shkëlqyer, duhet të arrijmë objektivin: kualifikim në Kupën e Botës në mars”.
Mbrojtësi i Juventusit nuk ka asnjë dyshim se cili është momenti më i mirë i vitit 2021: “Sigurisht, finalja e ‘Wembley’. Ajo ndeshje na lejoi të bëheshim legjenda për kombëtaren italiane. Ishte diçka e paharrueshme, por s’mund të jetosh në të kaluarën, por të mësosh prej saj për të ndërtuar një të ardhme të madhe”.