Vuajti shumë, por në fund Chelsea ia doli t’i marrë të trija pikët në shtëpi ndaj Leeds United. “Blutë” triumfuan 3:2, në një ndeshje që pati ndryshime të mëdha në rezultat.
Kështu, Chelsea këndellet pas humbjes që e pësoi ndaj West Hamit dhe rikthehet te fitoret për të mbajtur hapin me liderët e tabelës.
Leeds United arriti të kalonte në epërsi në minutën e 28-të të ndeshjes. Raphinha u tregua i saktë nga penalltia.
Nuk vonoi shumë dhe ekipi i Tuchel u kundërpërgjigj. Ishte Mason Mount që barazoi shifrat në minutën e 42-të, rezultat ky që mbylli pjesën e parë.
Në të dytën u shënuan edhe tre gola të tjerë. Fillimisht ishte Jorginho që realizoi nga penalltia në minutën e 58-të. Gelhardt barazoi rezultatin në 2:2 në minutën e 83-të të ndeshjes.
Por, në sekondat e fundit të ndeshjes u akordua edhe një penallti për Chelsean, nga ku i saktë u tregua sërish Jorginho, që i dha fitoren ekipit të tij.
Me këtë fitore Chelsea tani ka 36 pikë dhe gjendet në vendin e tretë, dy pikë më pak se City dhe një më pak se Liverpooli.
Në anën tjetër, Leeds United mbetet në vendin e 15-të me 16 pikë të tubuara.
