Milani dhe Interi kanë nisur tashmë rrugën e tyre për të ndërtuar stadiumin e ri ku do të luajnë, por çfarë do të ndodhë me stadiumin aktual, mitikun “San Siro”? Me asnjë prej skuadrave që luan në këtë impiant, hipoteza më e mundshme ështe ajo e shembjes së tij. Por shumë tifozë duan që stadiumi të mbijetojë si vepër historike dhe në fakt kanë gjetur një hapësirë ligjore që të jetë e tillë.
Në vitin 2026, nëse stadiumi do të mbetet në këmbë deri atëherë, do të mbushen 71 vite që nga ndërtimi i “unazës së dytë” të stadiumit, pjesës së sipërme të tij. Në këtë moment, hyn në fuqi normativa ligjore për pasuritë kulturore në Itali dhe impianti në fjalë do i nënshtrohet studimit historik-arkitektonik.
Ky studim mund ta shpallë impiantin në fjalë me “vlera historike” dhe të ndalojë shembjen e tij. Një gjë që kërkohet me ngulm nga një grup tifozësh që janë organizuar dhe kanë bërë kërkesën nëpërmjet një zyre ligjore në mënyrë që tempulli i futbollit milanez të mbetet në këmbë edhe pasi Milani dhe Interi ta kenë braktisur.
