Ndryshe nga Seria A, ku tri skuadrat e para në klasifikim janë të ndara të gjitha nga vetëm dy pikë, Premier League po sheh dominimin e Manchester City. Skuadra e drejtuar nga Pep Guardiola duket në rrugën drejt një tjetër titulli kampion, sepse është e distancuar me 9 pikë nga ndjekësi më i afërt, Liverpool, i cili megjithatë ka një ndeshje më pak.
Nëse kampionati më i bukur në botë nuk mund të thuhet se tashmë është mbyllur përfundimisht, kjo është falë “Reds”, që synojnë ta mbajnë sa më gjatë gjallë, ndoshta duke u përpjekur të shkurtojnë më tej diferencën. Në javën e fundit, skuadra e Klopp mori një fitore në fushën e Burnley, e “firmosur” nga Fabinho.
Mesfushori brazilian tani është bërë një lojtar i rregullt në listën e golit. Ai ka shënuar 5 gola në 7 paraqitjet e fundit, duke përfshirë dopietën në “FA Cup”, më 9 janar.
Trajneri i “Reds” ka folur në këtë mënyrë, pas ndeshjes, për golin e ish-lojtarit të Monaco: “Ai ndoshta do të kishte shënuar më shumë gola nëse do ta kisha përdorur gjithmonë në zonën e kundërshtarit gjatë goditjeve të caktuara. Mané ishte gjithashtu i mirë me një goditje me kokë për t’i shërbyer Fabinhos”.
Fabinho (i cili në tri sezonet e para në Angli kishte shënuar vetëm tri herë) në fakt nuk është i panjohur për dinamikën e shënimit. Me Monaco regjistroi edhe 12 gola në sezonin 2016-2017, kur skuadra e Principatës fitoi Ligue 1 dhe arriti deri në gjysmëfinale të Ligës së Kampionëve.
Për Interin, kundërshtarin e radhës të anglezëve në 1/16 të Champions League, do të ketë një rrezik shtesë, përveç Salah dhe Mané të njohur.
