Trajneri i Realit të Madridit, Karlo Ançeloti, ka lënë diplomacinë dhe ka nisur të flasë hapur me lojtarët e tij në lidhje me pozicionin që do të kenë në skuadër në sezonin e ardhshëm. Nga turneu që Madridi ka zhvilluar në SHBA tashmë është konfirmuar qartë se për disa lojtarë nuk do të ketë vend te Reali në sezonin e ardhshëm.
Dy prej tyre që vështirë se do të vijojnë në Madrid janë Odriozola dhe Mariano Diaz. Me përjashtim të Borha Majoral, që iu bashkua ekipit më vonë dhe më pas firmosi me Getafen, asnjë lojtar tjetër i Realit nuk ka luajtur më pak se dyshja Odriozola-Mariano Diaz, secili nga 30 minuta.
Trajneri Ançeloti e ka bërë të qartë që nga Los Anxhelosi, se objektivi i tij është të reduktojë numrin e lojtarëve deri në 25 dhe dyshja në fjalë mund të lirojë dhe më shumë skuadrën.
