Botërori i Katar pritet të jetë i fundit për disa yje të futbollit. Lionel Messi ishte një prej tyre, më i madhi, që njoftoi se ky do të jetë Botërori i tij i fundit. I fundit pritet të jetë edhe për C.Ronaldo, pavarësisht se ylli portugez vijon të shoh më larg duke premtuar se do ta shohim sërish në turne madhorë, objektivi i radhës i paralajmëruar është “Euro2024”. Në një moshë të madhe është edhe Robert Lewandowski, por as polaku nuk e ka njoftuar largimin e tij.
I radhës që njofton lamtumirën me ekipin përfaqësues është një mjeshtër si Luka Modric. Mesfushori kroat, në një intervistë për faqen e FIFA-s theksoi se ky do të jetë angazhimi i tij i fundit me përfaqësueses ballkanase: “Jam i vetëdijshëm që kam një moshe të caktuar dhe se ky do të jetë kompeticioni im i fundit me kombëtaren kroate”, – tha Modric për Fifa+.
Pasi arriti majën me Kroacinë duke shkuar deri në finalen e Botërorit në 2018 dhe pasi fitoi “Topin e Artë”, ideja e Modric është e qartë, të reduktojë sa më shumë numrin e ndeshjeve në mënyrë që të jetë më i freskët për Real Madrid, skuadër që ka ndërmend të nënshkruaj dhe një kontratë të fundit përpara se ta mbyll me futbollin profesionit.
