Tashmë është zyrtare, Daniele De Rosi nis karrierën e tij si trajner dhe emërohet në pankinën e skuadrës së SPAL në Serinë B italiane!
Ish-kampioni i Botës me Italinë në vitin 2006, ka firmosur një kontratë 2-vjeçare që do ta mbajë të lidhur në Ferrara për të paktën deri më 30 qershor 2024.
Këtë lajm e ka bërë vetë publike klubi i SPAL me anë të një komunikate në sajtin e saj zyrtar, duke i uruar mirëseardhjen ish-kapitenit të Romës në krye të pankinës.
Pas 18 viteve si futbollist me 616 prezenca në total nga të cilat 464 në Serinë A, 59 në Kupën e Italisë, 65 në Champions dhe 34 në Europa Ligë, Daniele De Rosi është ende lojtari i dytë me më shumë prezenca te Roma pas kapitenit legjendar të kryeqytetasve, Françesko Totit.
Pas largimit nga futbolli i luajtur, Toti ia “trashëgoi” shiritin e kapitenit mesfushorit për 207 ndeshje me radhë.
Si futbollist me Romën, 39-vjeçari fitoi 2 herë Kupën e Italisë, 1 herë Superkupën e Italisë ndërsa me fanellën e Boka Zhuniorsit në fundin e karrierës fitoi edhe një kampionat në Argjentinë.
Në sezonin 2008/2009, De Rosi u shpall nga Liga e Serisë A, lojtari më i mirë i vitit në elitën e futbollit italian.
Vlen të theksohet se ai në vitin e kaluar ishte pjesë e kombëtares së Italisë, duke qenë asistent i trajnerit Roberto Mançinit ku fituan dhe Kampionatin Europian.