Prestige ka shënuar fitoren e tetë në po kaq ndeshje të zhvilluara gjatë këtij sezoni në Sunday League Albania, duke i konsoliduar edhe më shumë pozitat në Grupin A, ku kryeson me pikë të plota (24)
Suksesi i radhës erdhi mbrëmjen e djeshme kundër skuadrës Ferraj, takim i luajtur në kompleksin Tirana United.
Një fitore me rezultatin 4-0 në një ndeshje të dominuar nga fillimi e deri në fund, ku përveç golave Prestige krijoi edhe shumë raste të tjera shënimi, ndërsa nuk rrezikoi thuajse asgjë në mbrojtje.
Shini, Ademi dhe Gjikola në pjesën e parë, si dhe Hysenbelliu në fraksionin e dytë ishin protagonistët e golave.
NDESHJA – Trajneri Eldiano Topi e nisi lojën me disa ndryshime në formacion në raport me sfidat e kaluara.
Megjithatë skuadra u përgjigj mjaft mirë në fushë që në fillim, ku i mjaftuan vetëm 4 minuta për të gjetur avantazhin me Shinin, i cili finalizoi mjaft mirë pas një asisti të Branicës, duke i “vjedhur” kohën mbrojtësit kundërshtar.
Në të 9-ën do të vinte edhe goli i dytë, këtë herë me autor Ademin, i cili shkëputet bukur pas shpinës së mbrojtjes kundërshtare dhe finalizon më së miri një tjetër asist të shkëlqyer nga Branica.
Prestige vijon me sulmet, teksa provojnë Shini e Vasha, por pa mundur që të shënjestrojnë portën.
Shënjestër të cilën e korrigjon Gjikola në të 18-ën, i cili përfiton nga një rrëmujë në zonë pas një këndoreje duke gjetur cepin e portës me një goditje të saktë, për t’i dërguar shifrat në 3-0.
Me këtë rezultat mbyllet edhe pjesa e parë e ndeshjes.
Në të dytën, Prestige bën disa ndryshime, teksa aktivizohen Biba, Hysenbelliu, Sheta dhe Hysko.
kuadra mban ritëm të lartë, ndonëse ndeshja zhvillohet në një terren të lagur nga reshjet e shiut, që nuk pushuan thuajse gjatë të gjithë takimit.
Në të 37-ën do të vinte edhe goli i katërt, me autor Hysenbelliun, i cili ekzekutoi saktë një penallti të fituar nga Ademi. Me gjithë rastet e shumta të krijuara, ku provuan me radhë Hysenbelliu, Biba dhe Shima, rezultati nuk ndryshoi më deri në fund, ndërsa Prestige futi në kasafortë 3 pikët e radhës në kampionat.
Me 4 golat e shënuar, Prestige e dërgon në 30 numrin e golave në këto 8 javë të para në Sunday League Albania, ndërsa numri i golave të pësuar është vetëm 6.
