Pol Pogba nuk arriti të rikuperohet për ndeshjet e Botërorit dhe synimi i tij është të rikthehet sa më shpejt në fushë për të ndihmuar Juventusin, ku u kthye në këtë verë, pas disa sezonesh te Mançester Junajtid.
Mediat italiane raportojnë se francezi do të kthehet në stërvitje dhe po bën maksimumin për t’u kthyer në ndeshjet e para të janarit.
Plani më optimist dhe i dëshiruar nga mesfushori është që debutimin e dytë me fanellën bardhezi ta bëjë më 13 janar në ndeshjen decizive ndaj Napolit.
Siç dihet, Pogba operoi meniskun e gjurit të tij të djathtë në shtator dhe deri më tani ai nuk ka mundur të vrapojë në fushën e blertë.
Tashmë raportohet se ai ka nisur planin e riaftësimit atletik, teksa ecuria e tij do të vërehet me kujdes nga mjekët.
Pas operacionit francezi është angazhuar vetëm në pishinë dhe në palestër, duke rritur gradualisht ngarkesën e tij fizike.
Nga e hëna ai do të nisë stërvitjen në kushte normale, me një program individual, teksa në harkun e 15 ditëve mesfushori pritet t’i bashkohet grupit në stërvitje.
