Zherard Pike ka qenë një nga personat më të besuar të Pep Guardiolës kur ky i fundit drejtonte Barcelonën. Por ish-futbollisti katalanas ka zbuluar se situata nuk ka qenë gjithmonë aq miqësore dhe në një moment të caktuar, trajneri i kishte vendosur një gjobë rekord.
Duke folur në emisionin “Jijantes”, ai zbuloi se pse në vitin e fundit të qëndrimit të trajnerit në Barcelonë situata mes të dyve ishte tensionuar paksa, edhe për faktin se pranoi se i pëlqente jeta e natës.
“Me Pep kishim një marrëdhënie spektakolare, por në vitin e fundit kishte në disa raste momente tensioni. Në fundviti për shembull unë festoja gjithmonë në Puigcerda. Atje bënte ftohtë, por unë shkoja me mëngë të shkurtra. Çdo vit isha i sëmurë prej kësaj gjëje me datë 2 janar. Ai nuk më grumbulloi për një transfertë në Tenerife dhe më masakroi gjatë gjithë rrugës”, tha lojtari i cili më pas zbuloi se për këtë arsye, Guardiola i kishte vendosur një gjobë prej 12 mijë eurosh dhe një darkë për t’u paguar të gjithë shokëve të skuadrës.
Guardiola nuk e kishte toleruar atë sjellje, por Pike u justifikua për gjithçka. “Isha 22-vjçr dhe në ato momente isha jashtë më shumë se sa dielli i ditës. Ishte gjithmonë si të luaje në limite me të, kërkoja të shihja deri ku mund të arrija”, shpjegoi Pike marrëdhënien me teknikun katalanas.
