Anglezët dhe zviceranët do të konsiderohen lojtarë të BE-së. Kjo u njoftua zyrtarisht nga FIGC, e cila për këtë arsye ka bërë një ndryshim shumë të madh për sa i përket statusit të lojtarëve që vijnë në Serie A nga jashtë.
“Futbollistët me nënshtetësi zvicerane dhe britanike, – thuhet në njoftimin për shtyp nga FIGC, – janë të barasvlershëm në të gjitha efektet me ato të BE-së. Këto dispozita do të zbatohen në lidhje me sezonin futbollistik 2023-2024”.
Për shembull, vendimi i FIGC përfshin drejtpërdrejt Milanin, i cili në këtë merkato verore ka nënshkruar me një lojtar anglez, pikërisht Loftus-Cheek nga Chelsea. Në mbledhjen e datës 24 korrik 2023, thuhet në njoftim, kërkesa që ishte marrë nga ‘Lega Nazionale Professionisti Serie A’ u pranua për të barazuar, për sa i përket rregullores, futbollistët britanikë me qytetarët e BE-së.
Pas Brexit-it të vitit 2020, në fakt, anglezët u konsideruan ekstrakomunitarë (jashtë BE-së), duke zënë vendet përkatëse për klubet. Një çështje që kushtëzoi në mënyrë të pashmangshme tregun dhe që tani është kthyer si ishte: Këshilli Federal i ka barazuar lojtarët britanikë me lojtarët zviceranë, sepse lojtarët nga Zvicra konsideroheshin tashmë lojtarë të BE-së.
