Krahasuar me emrin dhe kapacitetin e Partizanit, Bylisi është thjesht një sfidë e radhës, por këtë herë është ndryshe.
Në katër ndeshjet e fundit në Kategorinë Superiore Partizani ka grumbulluar vetëm 3 pikë, duke humbur terren ndjeshëm me Vllazninë dhe Egnatian, që renditen në dy vendet e para. Siç dihet, në lojë për dy vendet e para është avantazhi i barazimit në “Final 4”, që mund të jetë shumë i rëndësishëm për Partizanin, duke pasur parasysh edhe lojën që zhvillon dhe organikën që ka.
Presioni në kurriz të skuadrës dhe trajnerit është jo i vogël, pasi të kuqtë nuk duan të humbin kontaktin me dy vendet e para dhe nga ana tjetër as t’u japin besim skuadrave që renditen më poshtë, pavarësisht distancës aktuale. Partizani kërkon të dalë nga kriza në një moment kur as pozita e trajnerit Veselinoviç nuk është e padiskutueshme.
