Lajme të mrekullueshme kanë ardhur sot nga spitali për tifozin e Liverpool, Sean Cox, i cili u godit në mënyrë të pamëshirshme nga disa tifozë të Romës në gjysmëfinale të “Champions League” jashtë stadiumit “Anfield”.
53-vjeçari, babai i 3 fëmijëve, kishte udhëtuar nga Irlanda për të parë ndeshjen, por nuk e kishte llogaritur që disa tifozë të Romës do ta godisnin me çekiç dhe rripa në kokë.
Si rrjedhojë e kësaj ngjarje ai ishte në koma prej 3 muajsh, por sot mediat angleze shkruajnë se Cox fatmirësisht ka dalë nga kjo gjendje. Nga spitali i Dublinit “Beaumont Hospital” konfirmohet se tifozi ka rifituar vetëdijen dhe i është nënshtruar një rehabilitimi të përkushtuar.
Gjithashtu bëhet me dije se rikuperimi i tij është disi i avashtë, por me rëndësi është dalja nga koma.
