Diego Godin ka thyer heshtjen duke shpjeguar përse refuzoi ofertën e Manchester United, në ditën e fundit të merkatos, duke qëndruar te Atletico Madrid.
Pasi nuk arriti të marrë Harry Maguire dhe Toby Alderweid, United ishte gati të paguante 25 milionë euro për prishjen e kontratës së 32-vjeçarit me ekipin e Simeone, por uruguaiani tha “jo” dhe zgjodhi të qëndrojë te “Los Colchoneros” me të cilët do të luajë sot në Superkupën e Europës kundër Real Madrid.
“Unë kisha oferta, por i refuzova. U përpoqa të respektoja klubet që më kërkuan duke mos i përmendur, por lajmi doli dhe nuk e di nga doli. Më pas lexova sikur kisha rinovuar me Atletico. As kjo nuk është e vërtetë. I refuzova ofertat vetëm për arsye personale dhe jo sportive. Unë tani jam i përqendruar te Superkupa e Europës, sepse të ardhmen time e kam përcaktuar prej kohësh,” – tha Godin.
