Richarlison zbuloi se Neymar ishte idhulli i tij i fëmijërisë. Sulmuesi i Evertonit ka pasur një “fillim fluturues” të sezonit, duke shënuar tre gola për klubin e Premier Lague dhe dy gola për Brazilin (në miqësoren e fituar 5-0 ndaj El Salvador), më parë, këtë muaj, pasi bëri debutimin e tij ndërkombëtar.
21-vjeçari foli me admirim për Neymar, duke shkuar aq larg, sa kishte kopjuar edhe modelin e flokëve të yllit të PSG-së. “Neymar ka qenë idhull i imi që nga fëmijëria, – tha Richarlison për mediat angleze. – Gjithmonë jam përpjekur ta pasqyroj veten në mënyrën se si ai luan.
Madje, kam provuar të imitoj disa nga modelet e flokëve të tij. Kur kam qenë 12 ose 13 vjeç i kam bërë flokët të verdhë, si ai. Ia thashë Neymarit këtë gjë, për prerjen e flokëve si ai, gjatë drekës në kombëtare”.
Richarlison shënoi dy herë për Brazilin kundër El Salvadorit, më parë, këtë muaj, duke festuar bashkë me Neymar me një “valle pëllumbash”: “Është diçka që e organizuam në stërvitje, ai është një tifoz i asaj valleje dhe tha që, nëse shënonim në lojë, do të bënim atë lloj festimi. Është vallëzimi im, tani është ai që më kopjon (qesh)”.
