Luka Modric fitoi “Topin e Artë” në Kupën e Botës dhe fitoi çmimin “Futbollisti më i mirë FIFA”, në garën kundër Cristiano Ronaldo dhe Mohamed Salah në ceremoninë e zhvilluar mbrëmjen e të hënës në Londër. Modric fitoi këtë vit trofeun e tretë radhazi të Champions League me Real Madrid, dhe udhëhoqi Kroacinë e tij deri në finalen e Kupës së Botës, për tu mundur nga Franca. Referuar “Celebrity Net Worth”, fitimi financiar i Luka Modric përllogaritet në shumën £5.7milionë ( $7.5 milionë) në vit. Sikurse ndodh me shumë sportistë profesionistë, Modric gjeneron fitime nga futbolli, por edhe nga marrëveshjet e reklamave e të drejtës së imazhit.
Gjatë karrierës së tij, mesfushori kroat ka qenë protagonist i një serie marrëveshjesh të bujshme. Ai u transferua te Tottenham në vitin 2008 për një shumë që asaj kohe vendosi rekord, plot £16.5 milionë ($21.6 milionë). Ai më pas u transferua në Spanjë, te Real Madrid në vitin 2012 për £30 milionë ($39.3 milionë). Luka Modric u përfol për një transferim të undshëm te Inter Milan gjatë merkatos së verës. Vetë kroati ishte i gatshëm të transferohej, por Real Madrid refuzoi ofertën, me Modric që ka ende dy vite kontratë me Los Blancos.
