Paul Pogba është parë nga tifozët duke debatuar ashpër me Romelu Lukaku-n gjatë barazimit pa gola ndaj Valencias. Kampioni i Botës kaloi një tjetër ndeshje për t’u harruar dhe u vërshëllye nga tifozët në Old Trafford.
Ai përsëri nuk arriti të luante si pjesë e ekipit dhe humbi shumë topa në mesin e fushës. Por ishte një moment në veçanti që i tërhoqi vëmendjen tifozëve, pasi dy prej lojtarëve më të rëndësishëm të ekipit patën një debat të shkurtër 20 minuta përpara se të mbyllej sfida.
Lukaku, i cili bëri një paraqitje të tmerrshme, dukej i izoluar në sulm. Pogba donte që ai të krijonte hapësira për të kombinuar më tepër me ekipin por sulmuesi belg nuk lëvizi nga vendi.
Mesfushori e tregoi zhgënjimin e tij duke bërtitur drejt Lukakut me duart lart.
