“Tirona Fanatics” ka gjetur veten në deklaratën e ish-trajnerit Ze Maria. Në kushtet e një “divorci” total me klubin dhe presidentin Refik Halili, prej gati dy vitesh, tifo-grupi i njohur bardheblu ripërsërit kërkesën për largimin e drejtuesve, duke i konsideruar ata përgjegjës për situatën kritike, ku ndodhen 24 herë kampionët e vendit.
Presidenti, drejtori dhe menaxheri i bardhebluve, me emër e mbiemër, siç i nënvizonte Ze Maria në deklaratën e tij denoncuese, shihen edhe nga “Tirona Fanatics” si shkaktarët e degradimit të skuadrës më të titulluar në Shqipëri. Ja deklarata e plotë e tyre:
“Deklaratat e ish-trajnerit bardheblu, Ze Maria, janë pikërisht ato deklarata të cilat TF tashmë ka kohë që i përsërit e ripërsërit. Fajtorët kryesorë janë pseudodrejtuesit e pseudoklubit, bashkë me pseudopresidentin. Refik Halili, Hektor Como dhe Arbi Laci janë ata, që së bashku kanë punuar vetëm e vetëm për përfitime personale dhe në dëm të klubit.
Ata janë dashakeqësit e vërtetë të Tironës. Sa më shpejt të largohen të tre, bashkë me pseudo-senatorët, që ishin protagonistë në rënien e klubit, aq më mirë do të jetë për të gjithë. Tirona Fanatics i uron fat Ze Marias në karrierën e tij në vazhdim! Suksese Mister!”
