E ardhmja e Mesut Ozil është ende e paqartë edhe pse fantazisti i Arsenal duket se ka zgjedhur të ndryshojë skuadër dhe të luajë për Interin. Por nuk bëhet fjalë për skuadrën e trajnerit Luciano Spalletti, që luan në Serinë A, por për ekipin e Inter Miami CF, ku është pronar David Beckham.
Skuadra amerikane do të debutojë në MLS në vitin 2021, pikërisht në vitin që Ozil përfundon kontratën e tij me “topçinjtë”, ndaj dhe Beckham i ka bërë një ofertë fantazistit gjerman, për ta sjellë në skuadrën e tij. Beckham kërkon të ndërtojë një ekip të fortë, me yje në formacion dhe i beson shumë Mesut Ozil, i cili është në krizë muajt e fundit me Arsenal.
Edhe vetë Ozil nuk e ka fshehur kurrë dëshirën e tij për të luajtur në Major League Soccer dhe ka shansin e madh që ta bëjë këtë gjë, duke veshur fanellën e skuadrës së Inter Miami CF. Ndërkohë që, një tjetër Inter, ai i trajnerit Luciano Spalleti, pret rastin për ta sjellë fantazistin 30-vjeçar në Serinë A, teksa prej kohësh ka shfaqur interesim për mesfushorin gjerman.
