Qendërmbrojtësi dhe kapiteni i Real Madridit, Sergio Ramos, u bë viktimë e fishkëllimave të tifozëve gjatë ndeshjes së djeshme në finalen e Kupës së Botës për Klube. Tani është zbuluar se ai u fishkëllye nga tifozët lokalë në Emiratet e Bashkuara Arabe për shkak të Mohamed Salahut.
Të shtunën, Real Madridi u përballë me Al Ain në stadiumin e qytetit në Abu Dhabi dhe tifozët në tribunat e stadiumit ende mbanin inat ndaj spanjollin për ndërhyrjen që e kishte bërë ndaj Salahut në finalen e Ligës së Kampionëve sezonin e kaluar, transmeton Gazeta Express.
Sa herë Ramosi e prekte topin gjatë ndeshjes, ose edhe vetëm afrohej te topi, tifozët fillonin menjëherë të fishkëllejnë, duke ia kujtuar Ramosit se ata nuk e kanë harruar ndërhyrjen në Kiev sezonin e kaluar.
“Sulmuesi egjiptian është ikonë në futbollin arab dhe incidenti në Kiev ka bërë të arabët të kthehen kundër qendërmbrojtësit spanjoll. Kjo gjë u vërejt gjatë ndeshjes së djeshme”, shkruan Marca.
Megjithatë, fishkëllimat duket se nuk i penguan Ramosit shumë. Real Madridi arriti ta sigurojë një fitore me rezultat 4-1 kundër Al Ain, duke e fituar për të tretin vit radhazi trofeun e Kupës së Botës për Klube
Madje, edhe Ramosi arriti ta shënonte një gol, pas golit të Luka Modricit, Marcos Llorentes dhe një autogoli nga Nader Moustafa.
Kjo ishte finalja e 25-të për Ramos, duke i përfshirë ndeshjet edhe për Real Madridin edhe për Kombëtaren e Spanjës. Nga këto 25 finale, ai ka triumfuar në gjithsej 18 prej tyre.