Beppe Marotta ka shkuar tek Interi, por Juventusi vazhdon politikën e vet në merkato, që në vitet e fundit ka qenë shumë produktive për lojtarët me kosto zero. Mjafton të përmendim emra të tillë si Pirlo, Khedira, Dani Alves dhe Emre Can, për të kuptuar rëndësinë e kësaj filozofie pune.
Objektivi i ri për bardhezinjtë është Aaron Ramsey, një sulmues që mund të merret falas, i lindur në vitin 1990. Kontrata e tij me Arsenalin skadon në qershor të vitit 2019 dhe nuk do të rinovohet.
Natyrisht, marrja e Ramsey nuk do të jetë diçka e lehtë për Juventusin, sipas “Tuttosport”, sepse duhet pasur parasysh konkurrenca e klubeve të tjera të mëdha europiane si Barcelona dhe PSG, ndërsa Interi nuk duket në gjendje të garojë për një lojtar me pagë 8 milionë euro neto në sezon.
“Nyja” në këtë rast është edhe ekonomike, pasi, si në rastin e Emre Can, për ta bllokuar Ramsey iu duhet paguar komision i lartë agjentëve të tij.
Në këtë moment, sipas “Tuttosport”, Juventusi, që i ka kontaktuar tashmë të dy menaxherët e Ramsey, është në avantazh të qartë për uellsianin. Kjo, për shkak se mesfushori nuk duket shumë i tunduar nga PSG dhe Barcelona. Dy klubet në fjalë mund të preferojnë të riun De Jong të Ajax.
Te bardhezinjtë, Ramsey, i cili mund të luajë ose në mesfushë, ose si mesfushor-sulmues, do të ishte shumë i dobishëm, sidomos në verë, kur Khedira do të provojë një eksperiencë të re.
Së fundi, sa i përket merkatos së janarit, goditje e mundshme e Juventusit mbetet Todibo, i cili ka shkëlqyer me Toulouse dhe është i gatshëm të lëvizë menjëherë. Në vend të kësaj, Spinazzola bashkohet me problemet fizike të Cancelo dhe Cuadrado, që nuk mund të jenë në dispozicion të trajnerit Allegri.
