Real Madridi pësoi humbjen e katërt radhazi në shtëpi, të martën në mbrëmje, gjë që nuk kishte ndodhur që nga ndeshja e fundit e mandatit të Carlos Queiroz, në vitin 2004. “Marca” evidenton një numër statistikash interesante, pas drejtimit më të keq të klubit madrilen në kujtesën tuaj të fundit.
Duke qëndruar si kampion europian për më shumë se 1000 ditë, gjigandët spanjollë janë rrëzuar, edhe pse nuk do të ketë një kurorëzim të pasardhësit të tyre deri në finalen e “Wanda Metropolitano”, më 1 qershor. “Los Blancos” u dorëzuan në mënyrën më të turpshme, edhe pse Ajax luajti shkëlqyer me filozofinë e vet sulmuese në kryeqytetin spanjoll.
4-1 është rezultati, i cili lë një shenjë të pashlyeshme në psikologjinë e klubit mbretëror, galaktik për vite me radhë. Në të vërtetë, ky ishte eliminimi i parë i të bardhëve një raund para çerekfinales së Ligës së Kampionëve, që nga sezoni 2009-2010.
Që kur Manuel Pellegrini u largua nga stoli i gjigantëve të “Santiago Bernabeu”, Real Madridi ka shkuar deri në finale, ose gjysmëfinale të garës kryesore të klubeve në Europë. Të martën në mbrëmje mbërriti humbja e 14-të e sezonit, një shifër e njëjta me atë që ekipi kishte pësuar gjatë dy sezoneve, me trajner Zinedine Zidane.
Fitorja 3-0 e CSKA Moskës në “Santiago Bernabeu”, në dhjetor, ishte humbja më e rëndë në shtëpi e “Los Blancos” për Ligën e Kampionëve, por ajo është eklipsuar nga fitorja mbrëmshme e Ajax.
Wolfsburg, Schalke dhe Juventus e kanë kërcënuar dominimin kontinental të Real Madridit, por Cristiano Ronaldo dhe shokët e tij ishin gjithmonë në gjendje ta nxirrnin ekipin nga situata tepër të vështira.
Humbja e të bardhëve të martën ishte e treta në hapësirën e një jave, që në thelb i dha fund çdo shprese të një trofeu për pjesën e mbetur të këtij sezoni.
