Ish-lojtari i Juventusit, Paolo Montero, beson se nuk do të ishte fare çudi që të shohim trajner të bardhezinjve Antonio Conte, ose Zinedine Zidane, në sezonin 2019-2020, nëse Massimiliano Allegri do të largohet nga posti i tij. Ky i fundit është në rrugë të mirë për të fituar titullin e pestë të Serie A, këtë sezon, me 18 pikë përpara ndjekësve më të afërt, Napolit.
Sidoqoftë, dominimi lokal nuk është përkthyer në sukses kontinental. Juventusi e ka fituar të fundit Ligë Kampionësh në edicionin 1995-1996, para ardhjes së Monteros aty. Nëse Allegri vendos t’i japë fund bashkëpunimit 5-vjeçar me klubin bardhezi, Montero beson se duhet emëruar një emër i rangut të lartë në atë pozicion:
“Nuk do të befasohesha, nëse do të shihja Conte, ose Zidane në stolin e Juventusit, sezonin e ardhshëm. Jo, nuk do të habitesha fare. Juventusi ka arritur një nivel shumë të lartë dhe, nëse e ndryshon trajnerin, me siguri drejtuesit do të marrin një emër të spikatur. Zizou dhe Antonio janë dy fitues, ata e njohin mjedisin bardhezi shumë mirë, janë të dy emra të rëndësishëm“.
Montero, i cili kaloi gjithsej nëntë sezone në Torino, shtoi se ende e mbështet Allegrin për sukses, pavarësisht pretendimeve se një fytyrë e freskët është e nevojshme për të ringjallur ëndrrat kontinentale të Juventusit: “A është e vështirë për të ndjekur të njëjtin trajner për pesë vite? Jo, nuk mendoj kështu. Ne kishim Marcello Lippi për një kohë të gjatë dhe fokusi ka qenë gjithmonë shumë i lartë, forca e klubit është shumë e madhe dhe Juventusi është një klub shumë i fuqishëm. Çdo ditë aty kupton rëndësinë e klubit, qëllimet që duhen arritur. Ju nuk mund të gaboni. Nëse bëni një gabim, drejtuesit blejnë menjëherë dikë tjetër në vendin tuaj, është çështje mentaliteti“.
Eliminimi nga Champions-i (2018-2019) është në fije të perit, pasi bardhezinjtë vijnë nga disavantazhi 2-0 në fushën e Atletico Madrid. Kthimi do të luhet të martën. Montero, megjithatë, nuk ka asnjë dyshim se “Zonja e Vjetër” është e aftë të bëjë përmbysjen e paharrueshme: “Po, absolutisht, Juve mund ta kthejë disavantazhin. Po flasim për një ekip të nivelit të lartë. Sigurisht që do të jetë një lojë shumë delikate, sepse Atletico Madrid është një kundërshtar shumë i vështirë për t’u mundur. Unë mendoj se Allegri është në gjendje ta përgatisë ekipin e tij për të bërë gjënë e duhur. Juve ka gjithçka për të përjetuar një mbrëmje të veçantë. Me të vërtetë më pëlqen Allegri, ai gjithmonë bën zgjidhje të duhura për këto lloj ndeshjesh“.
