Më në fund Pep Guardiola buzëqesh. Lutja e tij drejtuar Zotit pas ndërprerjes së kampionatit u përmbush. Të gjithë lojtarët që shkuan në ekipet kombëtare u rikthyen pa dëmtime te Manchester City. Jo vetëm kaq, por edhe lojtarë me dëmtime të vjetra u rikthyen si Kevin de Bruyne, Fernandinho, Benjamin Mendy dhe John Stones. Kjo do të thotë që skuadra e City është e kompletuar para ndeshjes ndaj Fulham dhe trajneri spanjoll do t’i ketë të gjithë lojtarët në dispozicion në këtë moment delikat të sezonit.
“Të gjithë u rikthyen në ekip dhe të gjithë janë në formë. Zoti e dëgjoi lutjen time. Fernandinho, Kevin, Vincent… të gjithë janë në formë dhe gati për të luajtur. Edhe Mendy është në 100% të formës. Tani jam unë ai që duhet të menaxhoj të gjithë lojtarët, për të evituar probleme të tjera deri në fund të sezonit. Kam 21-22 lojtarë, të gjithë të aftë dhe gati për të luajtur, për të konkurruar mes tyre për të luajtur sa më shumë. Kjo është fantastike”, u shpreh Pep Guardiola.
