Sipas raportimit të “Radio Radio”, drejtori sportiv i Milan, Leonardo ka hyrë në dhomën e arbitrit Michael Fabbri në përfundim të ndeshjes së kuqezinjve të mundur me përmbysje nga Juventus me rezultatin 2-1 në “Allianz Stadium” të shtunën.
I njëjti burim i cituar nga “Calciomercato.com” bën me dije se Leonardo ka përplasur grushtat e tij mbi tavolinën e arbitrit në shenjë revolte dhe pakënaqësie ndaj gjykimit zhgënjyes të Fabbrit në atë supersfidë.
Skuadrës së AC Milan iu mohua një penallti e pastër në pjesën e parë dhe gjithashtu Leonardo ishte i tërbuar për vendimin e arbitrit që iu akordua ndeshja Juventus-Milan, si sfida e tij e parë e madhe në karrierë.
Referuar “Radio Radio”, futja e Leonardos në dhomën e Fabbrit u shoqërua me një përballje të ashpër të drejtuesit brazilian të kuqezinjve me arbitrin. Menjëherë pas kësaj përballje, Leonardo doli para kamerave për të vlerësuar e konsideruar arbitrin Fabbri si të papërshtatshëm e padenjë.
