Gjiganti italian Inter është duke e përgatitur një kontratë të re për kapitenin e skuadrës, Mauro Icardin, në tentim për ta larguar interesimin e Real Madridit, raporton CalcioMeraco.
Icardi është në formë të jashtëzakonshme këtë sezon pasi tashmë ka shënuar 18 gola për Interin dhe është golashënuesi i dytë më i mirë në këtë sezon në Serie A, pas Ciro Immobiles, transmeton Express.
Ndërkohë, duke marrë parasysh formën e dobët të Krim Benzemas dhe shkëlqimin e Icardit, Real Madridi ka shprehur interesim për ta sjellë në “Santiago Bernabeu” argjentinasin gjatë afatit kalimtar veror.
Icardi momentalisht paguhet 4.5 milionë euro në sezon te Interi, por me kontratën e re, me shumë gjasë ai do t’i fitojë 7 milionë euro në vit. Kontrata e re po ashtu do ta mbajë atë në skuadër deri më 2022 apo mbase 2023.
Aspekti më i rëndësishëm i kontratës së re, sipas mediumit italian, do të jetë klauzola e lojtarit, e cila pritet të rritet nga 110 milionë euro sa është aktualisht në 200 milionë euro.