Mesfushori Aaron Ramsey nuk do të luajë më asnjë ndeshje me Arsenal këtë sezon. Jo sepse ai sezonin tjetër do të transferohet te Juventusi, por se i dëmtuar nuk ka më asnjë shans të zbresë në fushë këtë sezon me “topçinjtë”.
“Më vjen keq që ndeshja ndaj Napoli në Europa League ishte e fundit këtë sezon për mua. Për fat të keq, dëmtimi nuk më lejon që të luaj në ndeshjet e mbetura dhe jam i zhgënjyer. Do të dëshiroja të ndihmoja Arsenal në Europë dhe Premier, por nuk kam mundësi”, tha Ramsey.
Duke falënderuar fansat, mesfushori 28-vjeçar thotë: “Ishte një rrugëtim i gjatë, brenda dhe jashtë fushës. Në 11 vite këtu kanë ndodhur shumë gjëra. Erdha kur isha një fëmijë, shumë llafazan. Ndërsa tani largohem si një kampion, baba i 3 fëmijëve dhe më shumë krenari, kujtime e trofe, që do t’i mbaj me vete. Këtë fundjavë do të luajmë ndeshjen e fundit në fushën tonë në Premier, ndaj do të jetë emocionuese”.
