Trajneri i Tottenhamit, Mauricio Pochetinno, beson se skuadra e tij mund ta përmbysë humbjen 1-0 të pësuar në shtëpi nga Ajaxi, në gjysmëfinalen e kthimit që do të zhvillohet nesër mbrëma në Amsterdam.
“Është e mundur nëse luan me guxim dhe mentalitet fituesi. Kjo është gjëja më e rëndësishme”, ka deklaruar Pochettino.
“Mendoj se tifozët, lojtarët dhe të gjithë ne jemi të zhgënjyer, pasi nuk e nisëm ndeshjen sikurse të ishte një gjysmëfinale e Ligës së Kampionëve. Në këtë nivel duhet hyrë në fushë me dëshirë të madhe për të treguar se çfarë ambicieje ke. Ky mbetet zhgënjimi ynë i madh nga sfida e parë. Tani duhet të paraqitemi ndryshe dhe ta kërkojmë finalen”, ka shtuar trajneri i Tottenhamit.
