Nesër në mbrëmje do të luhet finalja e shumëpritur mes Tottenhamit dhe Liverpoolit, e cila do të zhvillohet në stadiumin e Atletico Madridit, “Wanda Metropolitano”.
Kjo është hera e dytë në histori që përsëritet një finale britanike, pas asaj të vitit 2008 mes Chelseat dhe Manchester United.
Madridi do të jetë në qendrën e vëmendjes mbrëmjen e nesërme, ndërsa kryeqyteti spanjoll do të pushtohet nga tifozeria angleze.
Mendohet se mbi 100 mijë anglezë do të zbarkojnë në Spanjë për finalen e madhe, edhe pse shumë prej tyre nuk kanë mundur të sigurojnë një biletë.
Ndërkohë, edhe forcat e policisë në Spanjë janë në detyrë teksa 4.700 forca policie do të jenë të angazhuara për të shmangur incidentet, teksa në ndihmë do t’iu vijnë edhe dronët.