Besnik Hasi do të vazhdojë të qëndrojë në stolin e Al Raed në Arabinë Saudite, edhe pse menaxheri i tij ishte përpjekur në çdo mënyrë që ta kthente në Belgjikë gjatë javëve të fundit.
Sipas informacioneve nga Belgjika, ish-mesfushori i përfaqësueses shqiptare dëshiron që të bëhet përsëri pjesë e futbollit të rëndësishëm europian, nëse arrin të gjejë një klub i cili plotëson kushtet ekonomike përafërsisht si klubi i tij aktual.
Fatkeqësisht për Hasin, të gjithë klubet e kontaktuara e kanë refuzuar këtë sapo kanë mësuar se cila është rroga aktuale e Hasit.
Menaxheri i tij, Mogi Bajat, kontaktoi dhe nisi negociatat me Cercle Bruge dhe Charleroi gjatë ditëve të kaluara.
Por në asnjë prej rasteve nuk arriti të konkretizonte sapo u bëri të ditur se në vitin e tij të parë në Arabinë Saudite, Hasi kishte përfituar një rrogë 1,2 milionë euro.
Për më tepër, pasi renditi skuadrën në vendin e 8-të, klubi i cili fillimisht kishte menduar ta shkarkonte, i rriti rrogën, duke ia bërë tashmë 1,5 milion euro në sezon, shifër e paarritshme për klubet belge, por edhe për shumë kampionate të tjera më cilësorë në Europë.
Me pak fjalë, për përfitime të tilla, Hasi do të jetë i detyruar të vazhdojë në Arabinë Saudite dhe vetëm nëse ul ndjeshëm pretendimet financiare, atëherë mund të gjejë skuadra që e presin krahëhapur.
