Elseid Hysaj do të largohet nga Napoli, por e ardhmja e mbrojtësit shqiptar nuk dihet akoma.
Kohët e fundit u fol se për 25-vjeçarin interesohej Juventusi, por duket se bardhezinjtë tashmë kanë hequr dorë nga interesimi, për të marrë shërbimet e shqiptarit. Megjithatë interesimet për Hysajn nuk mungojnë, pasi një skuadër tjetër po përshpejton për të transferuar lojtarin.
Sipas asaj që shkruan “Sunday Express”, Totenhemi po nxiton për të marrë lojtarin e Napolit, pasi nuk ka edhe shumë kohë, duke ditur që merkato në Angli mbyllet në 8 gusht. “Spërsat”, larguan nga ekipi Tripier, i cili u transferua tek Atletiko Madridi, dhe tani po kërkojnë një zëvendësues.
Kontaktet e para me klubin italian kanë nisur, por De Laurentis kërkon të paktën 20 milionë euro për mbrojtësin, shumë kjo që konsiderohet e lartë nga anglezët, të cilët gjithsesi do të përpiqen të arrijnë një marrëveshje.