Aleksis Sançez mund të largohet nga Junajtid këtë merkato, dhe destinacioni i tij në rast largimi do të ishte Italia.
Sipas asaj që shkruan “The Telegraph”, për lojtarin ka shfaqur interes Roma, të cilët prej kohësh janë në kërkim të një sulmuesi. Verdhekuqtë janë të interesuar për të marrë shërbimet e 30-vjeçarit, në formën e huazimit për një sezon.
Pavarësisht se Solskjaer, shpesh herë është shprehur se Sançez, nuk do të largohet, mediat angleze thonë se Roma është shumë e interesuar për të transferuar kilianin. Sulmuesi kaloi para 2 sezonesh tek Junajtid nga Arsenali, në marrëveshjen për kalimin e Mikitarjan tek “Topçinjtë e Londrës”.
Gjithsesi gjatë 2 sezoneve me “Djajtë e Kuq”, Sançez ka qenë totalisht jashtë formës, teksa në 45 ndeshje ka shënuar vetëm 5 gola, dhe tani mund të nisë një aventurë të re, larg Premier Ligës.
