Sokol Cikalleshi nuk ndalet më dhe pasi ka siguruar formacionin në radhët e skuadrës së Akhisarspor, po shënon rregullisht me të, duke vazhduar formën e mirë që shfaqi që me ndeshjet e Kombëtares, ku gjeti rrjetën në 2 ndeshje radhazi.
Tani atyre dy golave ndaj Francës dhe Islandës u ka shtuar edhe 2 të tjerë radhazi në kampionat, fillimisht ai shënoi ndaj Menemen të Selmanit me penallti.
Ndërsa sot, ai gjeti rrjetën në suksesin 3-1 ndaj Hatajaspor, ku sigurisht ishte përsëri titullar.
Cikalleshi shënoi golin e fundit të skuadrës së tij, në shtesën e takimit, pasi ndoqi me vëmendje një kundërsulm të ndërtuar nga ekipi i tij, duke çuar shifrat në 3-1.
Gol që i dha mundësinë të vuloste rezultatin e sfidës, i festuar me një karton të verdhë, pasi sulmuesi shqiptar hoqi fanellën për të festuar poshtë tribunës së tifozëve.
Me këtë sukses, skuadra e Cikalleshit i është bashkuar Umraniespor në kreun e renditjes me 10 pikë pas 5 javësh kampionat.
