Neymar Junior tashmë ndodhet në Barcelonë për t’u përballur me ish-skuadrën e tij.
Sulmuesi brazilian ka zbarkuar në aeroportin “El Prat” me avion privat këtë të enjte bashkë me babanë e tij pas stërvitjes me PSG.
Nesër (e premte) në orën 09:30, do të paraqitet në gjyqin që ai ka me Barçën.
Ai pretendon se ka marrë vetëm 14 milionë nga 40 që ai ra dakord me klubin dhe kërkon edhe 26 milionë plus interesat.
Nga ana e saj, Barça gjithashtu e paditi Neymarin me pretendimin se ky bonus nënshkrimi ishte i lidhur me përmbushjen e tërë kontratës deri në qershor të vitit 2022, diçka që sulmuesi nuk e bëri, sepse ai u largua në 2 gusht 2017, pasi PSG pagoi klauzolën e tij të largimi, plot 222 milionë euro.
Gjyqi duhej të zhvillohej në 31 janar, por u shty sepse Barça kërkoi që PSG të paraqiste kontratat origjinale që lojtari ka me klubin parizien, diçka që deri më sot entiteti që kryeson Nasser Al-Khelaïfi kishte refuzuar t’i ofronte.
