Trajneri i Juventusit Mauricio Sarri u shfaq i pezmatuar në konferencën për shtyp pas humbjes së finales së Superkupës 3-1 përballë Lacios në Arabinë Saudite.
Tekniku italian arsyetoi se në këtë disfatë të “Zonjës së Vjetër” ndikoi lodhja e akumuluar nga sfida e fundit me Sampdorian në kampionat si dhe koha e pakët për të rikuperuar energjitë. Megjithatë, Sarri thekson se skuadra duhet të mësohet me kalendarin e ndeshjeve.
“Mendoj se erdhëm në këtë finale me mungesë energjish fizike dhe psikologjike. E kam thënë dhe më parë: më vjen shumë keq që humbëm. Nuk e di se si do të ndikojë kjo humbje te ne.
Lacio është në moment besimi të madh. Stërvitja e djeshme më dha një pamje tjetër. Ndoshta m’u duke seanca më e mirë të gjithë sezonin. Më dha përshtypjen e një shkëlqimi që ndoshta nuk ishte i vërtetë. Kjo na bëri të bënim 3-4 ndërrime në formacion.
Dy ditë më pak për t’u stërvitur? Ky është kalendari duhet të mësohemi”, përfundoi fjalën e tij tekniku Sarri pas finales së Superkupës së Italisë.
