Fitorja e Liverpulit në transfertën ndaj Lestërit të vendit të dytë ishte një sukses i cili u lejon të kuqve që të vënë njërën dorë mbi titullin kampion të Premier Ligës, i cili mungon prej 30 vitesh.
Jo më kot djemtë e drejtuar nga Klop e festuan gjatë fitoren 4-0 kundër “Dhelprave”, pasi brenda vetes e kuptonin rëndësinë e këtij trepikëshi dhe ndoshta të shtyrë edhe nga zhgënjimi për humbjen, Lestëri provoi që të prishë atmosferën dhe lumturinë e të kuqve, duke urdhëruar menjëherë zbritjen në terrenin e lojës të punëtorëve të stadiumit.
Por duke parë edhe fotot e dokumentuara, Virxhil Van Dajkut, mbrojtësit të Liverpulit, nuk i pëlqeu aspak një skenë, ku një prej punonjësve të stadiumit të Lestërit hyri në mes të grumbullit të lojtarëve të kuq, me korrësen e barit.
Holandezi Van Dajk jo vetëm e frenoi atë, por e detyroi dhe e shoqëroi që të dilte jashtë vijave të terrenit të lojës, derisa ai dhe shokët e tij të përfundonin festimet e fitores.
