Arsene Wenger ka insistuar se Mesut Ozil nuk do t’i bashkohet Manchester Unitedit në janar, por ka refuzuar ta hedhë poshtë mundësinë që gjermani të largohet gjatë verës.
Kontrata e Ozilit me Arsenalin skadon në fund të këtij sezoni, dhe ai është lidhur vazhdimisht me një numër skuadrash, përfshinë Barcelonën dhe Unitedin e Jose Mourinhos.
29-vjeçari mund të negociojë me skuadra tjera nga janari për ndonjë transferim të mundshëm në verë, dhe Wenger insiston se Ozil do ta përfundojë sezonin në “Emirates”, edhe pse nuk e mohoi se në verë mund të largohet.
“Sa afër? Nuk e di sa afër”, tha francezi kur u pyet nëse Ozil është afër nënshkrimit të një marrëveshjeje të re.
“Manchester United nuk na ka kontaktuar asnjëherë, gjithsesi, prandaj s’e di nga doli kjo. Ai do të qëndrojë deri në fund të sezonit, më pas gjithçka është e hapur”, ka shtuar ai.
