Kapiteni i Real Madridit dhe i kombëtares spanjolle, Sergio Ramos, publikoi një video, ku po ushtronte stërvitje të fortë fizike në palestrën e shtëpisë së tij. Deri këtu nuk ka gjë për t’u çuditur, nëse nuk ke parasysh se bëhet fjalë për pothuajse orën 11 të natës, kur njerëzit “normal” duhet të jenë në gjumë.
Megjithatë, karantinimi në shtëpi prej “Coronavirus” ka ndryshuar rrënjësisht edhe jetesën e futbollistëve profesionistë, të cilët mundohen ta ruajnë formën sportive duke u ushtruar orar pa orar, në mungesë të fushave të blerta dhe lirisë në to. “Qëndrueshmëri, këmbëngulje. Puno fort, luaj fort”, – shkruan Ramos në videon në fjalë.
