Lautaro Martinez mund të jetë lojtar i Realit të Madridit në sezonin e ri. Pas bisedimeve prej kohësh me Barcelonën, sulmuesi ka përfunduar në radarin e Realit.
Agjentët e futbollistit kanë pasur një takim me drejtuesit madrilenë dhe thuhet se është arritur marrëveshja për transferimin e sulmuesit argjentinas në kryeqytetin spanjoll. “Sportmediaset” raporton se Interi është i gatshëm ta lërë të lirë Lautaron, për të mbledhur të ardhura që do të investoheshin në merkato.
Plani i zikaltërve është që të marrin nga Reali rreth 50-60 milionë euro, plus të mos paguajnë për afrimin e Açraf Hakimi, i cili u bashkua me italianët në këtë merkato.
Kjo ide është pëlqyer edhe nga presidenti Perez, i cili njëkohësisht do i jepte një goditje të fortë rivalëve të Barcelonës, duke i rrëmbyer objektivin numër 1 në merkato, diçka që do tërbonte së tepërmi edhe Mesin që e donte argjentinasin te Barça.
Me të ardhurat që do grumbulloheshin nga shitja e Lautaros, Interi do i investonte të gjitha për afrimin e Ngolo Kante nga Çelsi, teksa për sulmin do tentohej afrimi i Edin Xhekos, një kërkesë e vjetër e Antonio Kontes, por mund të afrohet edhe Luka Joviç nga Reali në huazim me të drejtë blerje.
