Lazio ka marrë një barazim të rëndësishëm 1-1 në transfertë kundër Zenit-it.
Bardhekaltrit janë paraqitur në këtë ndeshje me plot 11 mungesa, mes të cilëve Strakosha, Immobile dhe Luis Alberto, por ka arritur gjithsesi të marrë një pikë që e mban të pamposhtur në Grupin F.
Ndeshja është zhbllokuar nga Erokhin në minutën e 32-të. Mesfushori i rusëve ka mposhtur Reina-n pas disa kombinimeve të bukura në zonën e rreptësisë.
Kundërpërgjigja e italianëve ka ardhur tetë minuta para fundit me Caicedo-n, që ka shënuar 23 minuta pas futjes në fushë në vend të Vedat Muriqit.
Rusët kanë arritur të shënojnë në minutën e 93-të me Mostovoy, por goli është anuluar nga VAR për një pozicion jashtë loje.
