Mallkimi i dëmtimeve nuk ka ndër mend që të rresht në shtëpinë bardhezi. Jo vetëm problemet në sulm, por ndërkohë Masimiliano Alegri duhet të shqetësohet edhe për repartin e mbrojtjes.
I fundit që ka shkelur në infermieri është Matia De Shiljo. Mbrojtësi i djathtë është mungesa e radhës që i shtohet Juventusit, në pritje të ndeshjes së radhës në kampionat, kundër Atalantës.
Ish-milanisti mungoi në seancën e ditës së djeshme, si rrjedhojë e një traume me pasojë ndrydhjen e muskujve të kofshës së majtë, të mbartur që nga derbi i fundjavës së kaluar.
Futbollisti do të vazhdojë të mbahen nën vëzhgim nga stafi mjekësor dhe, për momentin, nuk ka një afat të saktë mbi rikthimin e tij.
Në ditët në vazhdim, ai do t’u nënshtrohet analizave të tjera për të konfirmuar rëndësinë e problemit, apo edhe rezultatin e mundshëm që mund të japin kurat riaftësuese, për të kuptuar rikthimin e tij në fushat e lojës.
Për momentin, e sigurt është që Matia De Shiljo do të mungojë, kundër Atalantës. 25-vjeçari është lojtari i 16-të juventin, që sivjet është përballur me të paktën një dëmtim dhe si rrjedhojë e këtyre problemeve, ai ka humbur deri në këtë pjesë të sezonit 13 ndeshje sezonale (2 në Champions, 9 në kampionat dhe 2 në Kupën e Italisë).
Aktualisht, së bashku me De Shiljon, në infermieri qëndrojnë Bernardeski, Higuain dhe Kuadrado. Lajmi i mirë është se mbrojtë- si Benedikt Hëvedes, mesfushori Blez Matuidi dhe sulmuesi Mario Manxukiç janë rikthyer rregullisht në stërvitje dhe pritet të jenë të paktën në pankinë, për ndeshjen me Atalantën.
