Juventusi po kalon sezonin më të vështirë të 10 viteve të fundit, teksa përveç se e kanë humbur titullin, tashmë rrezikojnë edhe të mbeten edhe jashtë Ligës së Kampioneve për sezonin e ardhshëm. Akuza për këtë formë të bardhezinjve, shkon pikërisht te trajneri Andrea Pirlo, i cili pas përfundimit të këtij sezoni do të shkarkohet me shumë mundësi, por nuk do të jetë i vetmi.
Drejt largimit nga bardhezinjtë është edhe drejtori sportiv, Fabio Paratiçi. Drejtuesit e Juventusit po punojnë për trajnerin e ri për sezonin tjetër dhe alternativat nuk mungojnë.
Sipas asaj që raporton “L’Equipe”, në fillim të listës është trajneri aktual i Realit Zinedin Zidan, por jo vetëm. Thuhet se në listë është edhe trajneri i Lacios, Simone Inzagi i cili e njeh mirë kampionatin dhe te Juventusi mund të bënte mirë.
Bashkë me Inzagin te Juventusi mund të shkojë edhe drejtori i Lacios, Igli Tare, i cili do të merrte vendin e Paratiçit. Te Juventusi po mendojnë për një revolucion të madh dhe gjithçka mund të fillojë me Taren dhe Inzagin në krye të skuadrës.
