Italia ka shkëlqyer mbrëmjen e sotme në miqësoren ndaj Çekisë, duke trimfuar me rezultatin 4-0 në sfidën e zhvilluar në stadiumin “Renato Dall’Ara”, të Bolonjës. Një test tepër pozitiv ky para Europianit, teksa skuadra e Mançinit bindi si në lojë ashtu dhe në rezultat.
Imobile hapi serinë e golave në minutën e 23-të, teksa në të 42-të, ishte radha e Barelës, që i ndihmuar edhe nga një devijim i mbrojtësve kundërshtarë dyfishoi rezultatin. Të kaltërit realizuan edhe 2 herë të tjera në pjesën e dytë, me anë të Insinjes dhe Berardit. Kapiteni i Napolit, trefishoi shifrat në minutën e 66-të, ndërkohë që Berardi vulosi “pokerin” në të 73-tën.
Për sa i përket Europianit, Italia do e luajë sfidën e parë ndaj Turqisë më 11 qershor ora 21:00. Kjo përballe do të zhvillohet në Romë.
