“Atëherë, Hakimi do të largohet me të vërtetë?”.
Ka nisur me një pyetje shqetësimi intervista me Gazzetta dello Sport e Andrea Brehme.
“Nuk jam dakord me shitjen e tij”, ka thënë ish-ylli i zikaltërve dhe Gjermanisë. “Si tifoz interist, uroj që të qëndrojë. Do të ishte një humbje e madhe po të largohej. Është një nga më të fortët në botë në rolin e tij, ndoshta më i miri”.
Sipas Brehme, Inter duhet të marrë shembull nga Bayern.
“Inter është një klub i madh, që lufton gjithmonë për të fituar Serinë A dhe Champions League. Bayern Munich, për shembull, nuk do t’i shiste kurrë yjet e ekipit”.
Në lidhje me Lukaku-n:
“Një sulmues shumë i fortë. Nuk i mungon asgjë. Kë do të zgjidhja mes tij dhe Lewandowski-t? Romelu është më i ri… Robert luan me kampionë te Bayern, ndërsa te Polonia ka pak vështirësi. Lukaku e ka më të lehtë më kombëtaren. Gjithsesi, flasim për dy lojtarë të jashtëzakonshëm”.
