Eros Grezda ka nisur një etapë të re në karrierën e tij, teksa ka vendosur që të përjetojë një eksperiencë të re në kampionatin hungarez. Sulmuesi i përfaqësueses shqiptare, është zyrtarizuar sot si pjesë e ekipit të Zalaegerszeg në kampionatin hungarez.
Klubi ka bërë të ditur se ka siguruar firmën për një vit të futbollistit, me formulën e huazimit nga skuadra e Osijek, që zotëron kartonin e lojtarit. Grezda është vënë menjëherë nën urdhrat e trajnerit Gabor Boer, ndërsa në klubin e ri ka vendosur që të ndryshojë numër fanelle duke kaluar nga 11-a e preferuar, te 14-a.
Për Grezdën kështu nis një aventurë e re, pas dy vitesh shumë të turbullta te Osijek, ku problemet në fushën e lojës dhe jashtë saj, si dhe dëmtimet, bënë që sulmuesi të humbte edhe vendin në rreshtimin e skuadrës kroate dhe të kalonte më shumë kohë në pankinë e tribunë.
