Në ditët e fundit, dy të përditshme prestigjioze italiane si “Corriere della Sera” dhe “La Repubblica” kanë folur për disa “fërkime” mes Xhixhi Bufon dhe trajnerit të kombëtares, Xhixhi Di Biaxho. Sipas burimeve të sipërcituara, portieri ka pritur një përkrahje më të madhe nga komisari teknik i “Axurrëve”, i cili ditën e djeshme, në lidhje me këtë temë ka deklaruar: “Nuk ekziston asnjë lloj problemi mes meje dhe Xhixhit (Bufon).
Ne jemi në harmoni totale me njëritjetrin, flasim shpesh dhe ai dëshiron të marrë vetëm disa ditë më shumë kohë për të menduar në lidhje me rikthimin në kombëtare. Sapo të më njoftojë për vendimin e tij për të ardhmen, unë do të marr vendimet e mia për të mirën e ekipit”. Duke vijuar deklaratën e tij, Di Biaxho shpjegoi nevojën e tij për Bufon dhe eksperiencën e portierit. “Personalisht do ta doja Bufonin në kombëtare, pasi ia kam nevojën brenda dhe jashtë fushe. Nuk është se po i bëj nder, pasi tek Italia ka portierë në nivel, si Perin dhe Donaruma”, përfundoi trajneri i Italisë.
