Sulmuesi i Barcelonës, Martin Breithuejt, ka marrë pjesë në një dokumentar të organizuar nga “433” dhe “Lucky Mental”, ku ndër të tjera ka kujtuar fëmijërinë e tij.
Gjatë emisionit ai ka rrëfyer se babai i tij ka qenë shumë i ashpër me të kur ishte ende fëmijë. Fillimisht ka qenë babai i tij, i cili ka treguar gjithashtu ashpërsinë e tij kundrejt të birit.
“Kur Martin luante futboll i vogël ia kam bërë shumë të vështirë. Gjithnjë e vija nën presion, e çoja deri në limite”, ka thënë babai i sulmuesit të Barçës.
Vetë sulmuesi danez, duke komentuar fëmijërinë është shprehur:
“Babai im ka qenë shumë i ashpër me mua, që kur isha fëmijë, sillej me mjaft rreptësi. Unë isha fëmijë dhe shumë gjëra nuk i kuptoja dhe gjithçka më dukej e ndërlikuar.
Madje, kishte raste kur mendoja se çfarë babai është ky, nëse më donte apo jo”. Breithuejt u transferua në verën e vitit 2020 te Barcelona, por për momentin nuk luan pasi është i dëmtuar.
